Aus dem „Güstrower Jahrbuch 2007“…
Jochen Peters
Oewer n‘ Ingenieurbüro

Ik bläder grad noch mal in dat Güstrower Johrbauck 2007 un bekiek mi de Monatsbiller. Dor fin ik Brüggen aller Ort. Dorbi denk ik mi so, frag’doch mal dien‘ Jung, wegger Brüggen hei in uns Gegend buugt het, ik mein, wecker hei tau Papier bröcht het un wat hei mit sin Lüd noch so bedrieben deit.

Min Soehn is mit sin Ingenieurbüro siet 1995 in Moehlengeez tau Hus. To viert gahn sei dor tosamen dörch „Dick un Dünn“, ümmer vöran, so as dat sin mööt, ehr Chef, uns Soehn, Dipl.-Ing. Uwe Peters. Dor schwellt mi orrig de Kamm, wenn ik dat hür – un Mudders ok.

Updräg kamen ut alle Gegend, taumierst ut Nuurddütschland. Dat sünd Projekte för Hotels, Büro- un Geschäftshüser, Industriehallen un sünstige Konstruktionen, Einfamilienhüser, Brüggen un Brüggenreparaturen, -Sanierung seggt man ja hüt. Un dortau kamen väle lütte Saken, as Brüggengelänner, Finstergitter, Dur un Durposten un noch väl mihr.

Min Jung vertellt mi: So hebben wi för n‘ Deel Brüggen oewer den‘ Stadtgraben in Güstrow de Projekte maakt un bi de Arbeiten ok na’n Rechten keken. Väl Arbeit maakte de Hageböcker- un de Pierdmarktbrügg. De sünd nu Standfast un passen gaud in’t Stadtbild, grad so, un dorvon heff ik mi oewertügt, as de Fautgängerbrügg von de Wallstraat na de Lindenstraat.

Ik dacht mi ümmer, de Brüggen hebben blots Namen, so Swins-Brügg, Kauh-Brügg orrer Hoch-Brügg, ne, de hebbt‘ ok Nummern!
Dicht bi, so vertellt hei mi, hebben’s in de letzt Tied ne Brügg in Lissow, un ein Autobahnbrügg oewer de Bahngleisen bi Glasewitz projektiert. Up stunn’s hebbt se ne Brügg oewer de A 24 bi Kogel na Sleswig-Hollstein in’e Mak.

Dat se nich blots Brüggen, sunnern ok Wahnhüser, grot un lütt, ja sogor n‘ Pierdstall plant hebbt, dat heff ik mi in uns Ümgegend beseihn.

Ein ganz groot Ding wir för dat Büro de Arbeit an den’n Entwurf un dat Projekt „Yachthafen- Residenz“ in Warnemün‘-Hohe Düne. Dat is schon wat, bi so’n Objekt dorbi tau sin.

Ja, un noch wat: Dat Ingnieurbüro treckt in‘ Januar 2008 von Moehlengeez na Güstrow in‘ Fischerweg üm!

Wenn se mal Hülp bruken, bi ne Saak, de ok fast stahn sall – ne Statik dorför kriegen se dor ok – orrer irgend n‘ Hüsung ümbuugen wullt, dat Büro hett bestimmt n‘ gauden Infall!